Organo-transplanteak hedabideetan sarritan entzuten dugun gaia da, batez
ere azkenaldi honetan, kontu medikuengatik baino, gehiago transplanteen
inguruko gorabehera ekonomikoak direla eta.
Lehenengo transplantea 1905an izan zen, korneakoa. Baina
ezagunagoa da 1967an Barnard doktoreak egindakoa, bihotza lehen aldiz
transplantatu zuenean.
Hartzailea deritzo organoa jasotzen duen pertsonari, eta transplantea bai bere
bizia salbatzeko bai bere bizi-kalitatea hobetzeko egiten zaio. Organo-emailea,
berriz, heriotza entzefalikoan dagoen baina bihotza artifizialki
funtzionamenduan mantentzen zaion pertsona da, transplantatuko diren organoak
egoera egokian egon daitezen. Zenbait kasutan, hala ere, emailea bizirik dagoen
gizabanakoa izan daiteke, hala nola, berriztagarriak diren ehunak
transplantatuko dituelako (larruazala, adibidez) edota ezinbestekoa ez den organoa
(giltzurruna, esaterako).
Hainbat transplante mota daude:
- Autotransplantea: emailea eta hartzailea gizabanako bera da. Ez dago errefusatzerik. Adibidez, odol-hodiak edo larruazala.
- Isotransplantea: emailea eta hartzailea biki unibitelinoak dira, genetikoki berdinak. Ez dago errefusatzerik.
- Xenotransplatea: emailea eta hartzailea espezie ezberdinekoak dira. Errefusatzea egon daiteke.
- Alotransplantea: emailea eta hartzailea espezie berekoak dira, baina genetikoki ezberdinak. Kasu arruntena da. Errefusatzea egon daiteke.
Organo-transplanteek badituzte hainbat arazo. Errefusatzeaz gain, organo urritasuna egon daiteke. Gainera, kontuan hartu behar da badaudela eskura ezin daitezkeen organo edo ehunak. Honetaz gain, errefusatzea saihesteko organo-hartzaileek inmunosupresoreak hartu behar dituzte bizi osoan zehar. Hainbat errefusatze mota egon daitezke. Baliteke, gainera, transplantaturiko organoa hartzailearekiko errefusatzea garatzea.
Bestalde, espainiar legediaren arabera, ezin da transplante batengatik
onura ekonomikoak irabazi. Hau horrela izanik, organoak edo ehunak saltzeko aukera
eman behar dela iradoki da, pertsona askok bizitzen ari diren krisi-egoera
hobetzeko. Hala eta guztiz ere, organo-emaileak areagotuz joan dira urteak
igaro ahala gaur egun dagoen eskuzabaltasunean oinarritutako sistemarekin.
No hay comentarios:
Publicar un comentario